കൊടുവള്ളി : പുള്ളാവൂർ കുറുങ്ങാട്ടുകടവിൽ ചെറുപുഴയിൽ ലോകകപ്പ് ഫുട്ബോളിനോടനുബന്ധിച്ച് ഫുട്ബോൾ ആരാധകർ സ്ഥാപിച്ച കട്ടൗട്ടുകൾ മാറ്റണമെന്നാവശ്യപ്പെട്ട് കൊടുവള്ളി നഗരസഭയ്ക്കും പരാതി. അഭിഭാഷകനായ ശ്രീജിത്ത് പെരുമനയാണ് കൊടുവള്ളി നഗരസഭാസെക്രട്ടറിക്ക് ഓൺലൈൻവഴി പരാതി നൽകിയത്. മെസ്സിയുടെയും നെയ്മറിന്റെയും കട്ടൗട്ടുകൾക്കെതിരേ പരാതി നൽകിയതിനെത്തുടർന്ന് ചാത്തമംഗലം ഗ്രാമപ്പഞ്ചായത്ത് സെക്രട്ടറി കട്ടൗട്ടുകൾ നീക്കംചെയ്യാൻ ആവശ്യപ്പെട്ടിരുന്നു. എന്നാൽ, കട്ടൗട്ട് സ്ഥാപിച്ചത് കൊടുവള്ളി നഗരസഭാപരിധിയിലാണെന്നും കട്ടൗട്ടുകൾ മാറ്റേണ്ടതില്ലെന്നും പറഞ്ഞ് കൊടുവള്ളി നഗരസഭാചെയർമാൻ വെള്ളറ അബ്ദു രംഗത്തെത്തിയിരുന്നു. ഈ സാഹചര്യത്തിലാണ് കൊടുവള്ളി നഗരസഭയ്ക്കും പരാതി നൽകിയത്. മെസ്സിയുടെയും നെയ്മറിന്റെയും കട്ടൗട്ടുകൾക്കുപുറമേ ക്രിസ്റ്റ്യാനോ റൊണാൾഡോയുടെയും കൂറ്റൻ കട്ടൗട്ടും പുഴയിൽ സ്ഥാപിച്ചിട്ടുണ്ട്. അന്താരാഷ്ട്രതലത്തിൽതന്നെ ചർച്ചയായ കട്ടൗട്ടുകൾ കാണുന്നതിനായി ദിവസവും ഒട്ടേറെപ്പേരാണ് പുഴയിലെത്തുന്നത്. അർജന്റീന ടീമിന്റെയും ഫിഫയുടെയും ഒഫീഷ്യൽ പേജുകളിൽപ്പോലും കട്ടൗട്ട് ഇടംനേടിയിട്ടുണ്ട്. കട്ടൗട്ടുകൾ നീക്കണമെന്ന പരാതി സംബന്ധിച്ച് വിശദമായ അന്വേഷണം നടത്തിയശേഷമേ മറുപടി നൽകാൻ കഴിയുകയുള്ളൂവെന്ന് നഗരസഭാസെക്രട്ടറി ഷാജു പോൾ പറഞ്ഞു.
