തിരുവമ്പാടി: ആനക്കല്ലുംപാറ കഴിഞ്ഞാൽ കൂമ്പാറ-കക്കാടംപൊയിൽ റോഡിലെ പ്രധാന അപകടമുനമ്പായി മാറിയിരിക്കുകയാണ് പിടികപ്പാറ വളവ്. കഴിഞ്ഞമാസം മാത്രം ഒട്ടേറെ വാഹന അപകടങ്ങളാണ് ഇവിടെ ഉണ്ടായത്. കാറുകളും ബൈക്കുകളുമാണ് സ്ഥിരമായി അപകടത്തിൽപെടുന്നത്.
വളവുതിരിവുകളേറെയുള്ള ഈ കയറ്റിറക്കത്തിൽ വാഹനങ്ങൾ നിയന്ത്രണംവിടുന്നത് ആവർത്തിക്കുകയാണ്.
റോഡ് തിരിവിലെ കൊക്കകരം വലിയ ഭഷണിയാണ്. റോഡിന്റെ ഘടനയെക്കുറിച്ചറിവില്ലാത്ത വിദൂരങ്ങളിൽ നിന്നുള്ള വിനോദ സഞ്ചാരികളാണ് സ്ഥിരമായി അപകടത്തിൽപെടുന്നത്. പീടികപ്പാറ പള്ളിക്ക് മുകളിലാണ് ഈ കൊടുംവളവ്. വളവിന്റെ വ്യാപ്തിയും കാഴ്ചമറയ്ക്കുന്ന കാടുകളും കാരണം എതിർദിശയിൽനിന്ന് വരുന്ന വാഹനങ്ങൾ പെട്ടെന്ന് കാണാൻ കഴിയാത്ത അവസ്ഥയാണുള്ളത്. ഇവിടെ ക്രാഷ് ബാരിയറുകളും മുന്നറിയിപ്പ് ബോർഡുകളും സ്ഥാപിക്കാൻ അടിയന്തരനടപടി വേണമെന്നാണ് നാട്ടുകാരുടെ ആവശ്യം.
