ഫോണുകളിൽ പ്രത്യക്ഷപ്പെടുന്ന അപരിചിതമായ പോപ്പ്-അപ്പുകൾക്കെതിരെ (Pop-ups) ജാഗ്രതാ നിർദേശവുമായി കേരള പോലീസ്. സിസ്റ്റം അപ്‌ഡേറ്റ് ചെയ്യാനെന്നോ ഫോണിലെ വൈറസുകൾ നീക്കം ചെയ്യാനെന്നോ തോന്നിപ്പിക്കുന്ന രീതിയിലുള്ള സന്ദേശങ്ങളുമായി എത്തുന്ന പോപ്പ്-അപ്പുകൾ വലിയ സൈബർ കെണിയാണെന്ന് പോലീസ് മുന്നറിയിപ്പ് നൽകുന്നു.
ഇത്തരം സന്ദേശങ്ങളിൽ ക്ലിക്ക് ചെയ്യുമ്പോൾ ഫോൺ തനിയെ റീസ്റ്റാർട്ട് ആകുകയും, തട്ടിപ്പുകാർക്ക് ഫോണിലെ ഡാറ്റയിലേക്കും വ്യക്തിഗത വിവരങ്ങളിലേക്കും കടന്നുകയറാൻ സാധിക്കുകയും ചെയ്യുന്നു. ഇത് ബാങ്ക് അക്കൗണ്ടിലുള്ള പണവും മറ്റു സുപ്രധാന വിവരങ്ങളും നഷ്ടപ്പെടാൻ ഇടയാക്കും.
പ്രധാന ശ്രദ്ധാകേന്ദ്രങ്ങൾ:
ക്ലിക്ക് ചെയ്യരുത്: സിസ്റ്റം അപ്‌ഡേറ്റുകൾക്കോ വൈറസ് ക്ലീനിങ്ങിനോ ഉള്ള അപരിചിതമായ പോപ്പ്-അപ്പുകളിൽ ക്ലിക്ക് ചെയ്യാതിരിക്കുക.
വിവരങ്ങൾ പങ്കുവെക്കരുത്: വ്യക്തിപരമായ വിവരങ്ങളോ ബാങ്കിങ് സംബന്ധമായ രേഖകളോ ഒപ്പുകളോ പങ്കുവെക്കാതിരിക്കുക.
റിമോട്ട് ആക്സസ് നൽകരുത്: അജ്ഞാത ആപ്പുകൾ വഴിയോ സന്ദേശങ്ങൾ വഴിയോ ഫോണിലേക്ക് റിമോട്ട് ആക്സസ് അനുവദിക്കരുത്.
സംശയങ്ങൾ ചോദിച്ചറിയുക: എന്തെങ്കിലും സംശയങ്ങൾ ഉണ്ടായാൽ കുടുംബാംഗങ്ങളോടോ സൈബർ പോലീസിനോടോ ചോദിച്ച് ഉറപ്പുവരുത്തുക.
ഓൺലൈൻ സാമ്പത്തിക തട്ടിപ്പിനിരയായാൽ ഉടൻ തന്നെ 1930 എന്ന ഹെൽപ്പ് ലൈൻ നമ്പറിലോ www.cybercrime.gov.in എന്ന വെബ്‌സൈറ്റ് വഴിയോ പരാതി രജിസ്റ്റർ ചെയ്യണമെന്ന് സംസ്ഥാന പോലീസ് മീഡിയ സെന്റർ അറിയിച്ചു.
