ലോക്സഭാ ഉപതെരഞ്ഞെടുപ്പ്;സൂക്ഷ്മ പരിശോധന പൂര്ത്തിയായി മത്സരരംഗത്ത് 16 സ്ഥാനാർത്ഥികൾ
വയനാട് ലോക്സഭാ മണ്ഡലത്തില് നാമനിര്ദ്ദേശ പത്രികകളുടെ സൂക്ഷ്മ പരിശോധന പൂര്ത്തിയായി. 16 സ്ഥാനാര്ത്ഥികളാണ് നാമനിര്ദ്ദേശ പത്രികകളുടെ സൂഷ്മ പരിശോധനയ്ക്ക് ശേഷം മത്സര രംഗത്തുള്ളത്. നവ്യാ ഹരിദാസ് (ഭാരതീയ ജനതാ പാര്ട്ടി), പ്രിയങ്ക ഗാന്ധി വാദ്ര (ഇന്ത്യന് നാഷണല് കോണ്ഗ്രസ്), സത്യന് മൊകേരി (കമ്മ്യൂണിസ്റ്റ് പാര്ട്ടി ഓഫ് ഇന്ത്യ), ഗോപാല് സ്വരൂപ് ഗാന്ധി (കിസാന് മജ്ദൂര് ബറോജ്ഗര് സംഘ് പാര്ട്ടി), ജയേന്ദ്ര കര്ഷന്ഭായി റാത്തോഡ്(റൈറ്റ് ടു റീകാള് പാര്ട്ടി), ഷെയ്ക്ക് ജലീല് (നവരംഗ് കോണ്ഗ്രസ് പാര്ട്ടി), ദുഗ്ഗിറാല നാഗേശ്വര റാവൂ (ജതിയ ജനസേവ പാര്ട്ടി), എ.സീത (ബഹുജന് ദ്രാവിഡ പാര്ട്ടി), സ്വതന്ത്ര സ്ഥാനാര്ത്ഥികളായ അജിത്ത് കുമാര്. സി, ഇസ്മയില് സബിഉള്ള, എ.നൂര്മുഹമ്മദ്, ഡോ. കെ പത്മരാജന്, ആര്. രാജന്, രുഗ്മിണി, സന്തോഷ് ജോസഫ്, സോനുസിംഗ് യാദവ് എന്നിവരുടെ പത്രികയാണ് സൂഷ്മ പരിശോധനയ്ക്ക് ശേഷം പ്രാബല്യത്തിലുള്ളത്. വിവിധ മുന്നണികളുടെ സ്ഥാനാര്ത്ഥി പട്ടികയില് യഥാര്ത്ഥ സ്ഥാനാര്ത്ഥികളുടെ പത്രിക സൂഷ്മ പരിശോധനയില് സ്വീകരിച്ചതോടെ ഡമ്മിയായി നല്കിയ പത്രികകള് അസാധുവാവുകയായിരുന്നു. വരണാധികാരിയും ജില്ലാ കളക്ടറുമായ ഡി.ആര് മേഘശ്രീയുടെ നേതൃത്വത്തിലാണ് നടപടികള് പൂര്ത്തിയാക്കിയത്. ഒക്ടോബര് 30 നാണ് പത്രിക പിന്വലിക്കാനുള്ള അവസാന തിയതി. അതിന് ശേഷം മണ്ഡലത്തിലെ അന്തിമ സ്ഥാനാര്ത്ഥി പട്ടിക നിലവില് വരും.
തെരഞ്ഞെടുപ്പ് ജീവനക്കാര്ക്കുള്ള പരിശീലനം വയനാട് ലോക്സഭാ മണ്ഡലം ഉപതെരഞ്ഞെടുപ്പിന്റെ ഭാഗമായി സുല്ത്താന്ബത്തേരി നിയോജക മണ്ഡലത്തില് നിന്നും തെരഞ്ഞെടുപ്പ് ജോലിക്ക് നിയോഗിക്കപ്പെട്ടിട്ടുള്ള പ്രിസൈഡിങ്ങ് ഓഫീസര്, പോളിങ്ങ് ഓഫീസര് 01 എന്നിവര്ക്കുള്ള പരിശീലനം ഒക്ടോബര് 30 ന് നടക്കും. മാനന്തവാടി മണ്ഡലത്തില് നിന്നുള്ളവര്ക്കുള്ള പരിശീലനം ഒക്ടോബര് 31 ന് നടക്കും.കല്പ്പറ്റ നിയോജകമണ്ഡലത്തില് നിന്നുളളവര്ക്കുള്ള പരിശീലനം നവംബര് 1 നും നടക്കും. സുല്ത്താന് ബത്തേരി ഡയറ്റ്, ഗവ.സര്വജന ഹയര്സെക്കന്ഡറി സ്കൂള് എന്നിവടങ്ങളാണ് പരിശീലന കേന്ദ്രങ്ങള്. പരിശീലനത്തിനായി നിയോഗിക്കപ്പെട്ട ഉദ്യോഗസ്ഥര് പരിശീലനം തുടങ്ങുന്നതിന് 15 മിനുറ്റ് മുമ്പ് പരിശീലനഹാളില് എത്തേണ്ടതാണ്.
