മുക്കം: മുസ്ലിം ലീഗ് തിരുവമ്പാടി നിയോജക മണ്ഡലം കമ്മിറ്റി സംഘടിപ്പിച്ച റംസാൻ – വിഷു – ഈസ്റ്റർ സ്നേഹ സംഗമം മതസൗഹാർദ വേദിയായി മാറി. കക്ഷി മത രാഷ്ട്രീയ ചിന്തകൾക്കതീതമായി നിരവധി പേരാണ് സംഗമത്തിന്റെ ഭാഗമായത്.
സംഗമം മുസ്ലിം ലീഗ് സംസ്ഥാന പ്രസിഡന്റ് പാണക്കാട് സാദിഖലി ശിഹാബ് തങ്ങൾ ഉദ്ഘാടനം ചെയ്തു.മനുഷ്യ മനസുകൾക്കിടയിൽ വിടവ് വീഴ്ത്താൻ ഛിദ്ര ശക്തികൾ ശ്രമിക്കുന്ന കാലത്ത് മാനവ സൗഹൃദത്തിന് കരുത്ത് പകരുന്ന കൂട്ടായ്മകൾ ഉയർത്തി കൊണ്ട് വരണമെന്ന് അദ്ദേഹം പറഞ്ഞു. ഇത്തരം കൂട്ടായ്മകൾക്ക് രാഷ്ട്രീയ മത സാമുഹിക സംഘടനകൾ നേതൃപരമായ പങ്ക് വഹിക്കണമെന്നും മതപരവും പ്രാദേശികവുമായ ആഘോഷങ്ങളെല്ലാം മനുഷ്യർ പരസ്പരം കുടിചേരാനും സഹവർത്തിത്വം വർധിപ്പിക്കാനും ഉപയോഗപ്പെടുത്തണമെന്നും അദ്ദേഹം കൂട്ടി ചേർത്തു.
നിയോജക മണ്ഡലം പ്രസിഡന്റ് സി.കെ. കാസിം അധ്യക്ഷത വഹിച്ചു. ഫാ. ഡോ. ഷിബു കളരിക്കൽ, എ.പി. മുരളീധരൻ മുഖ്യാഥിതികളായി. മുസ്ലിം ലീഗ് സംസ്ഥാന സെക്രട്ടറി സി.പി. ചെറിയ മുഹമ്മദ്, സെക്രട്ടറിയേറ്റ് അംഗം വി.എം. ഉമ്മർ, മണ്ഡലം ജനറൽ സെക്രട്ടറി പി.ജി മുഹമ്മദ്, ജില്ലാ സെക്രട്ടറി വി.കെ. ഹുസൈൻ കുട്ടി, കെഎൻഎം ജനറൽ സെക്രട്ടറി എം. മുഹമ്മദ് മദനി, സമസ്ത മാനേജർ കെ. മോയിൻകുട്ടി, ഓർഫനേജ് കൺട്രോൾ ബോർഡ് ചെയർമാൻ എൻ. അലി അബ്ദുള്ള, മാധ്യമ പ്രവർത്തകൻ ഒ. അബ്ദുല്ല, പഞ്ചായത്ത് പ്രസിഡന്റ് വി.പി. സ്മിത, നിയോജക മണ്ഡലം യുഡിഎഫ് ചെയർമാൻ എ.എം. അഹമ്മദ് കുട്ടി ഹാജി തുടങ്ങിയവർ സംബന്ധിച്ചു.
