തിരുവമ്പാടി: തുടർച്ചയായ മഴയിൽ മലയോരത്ത് കെടുതികൾ തുടരുന്നു. തിരുവമ്പാടി-പുന്നയ്ക്കൽ റോഡിൽ നെല്ലാനിച്ചാലിൽ റോഡ് ഇടിഞ്ഞ് കുഴി രൂപപ്പെട്ടു. ബസ് കാത്തിരിപ്പു കേന്ദ്രത്തിന് എതിർവശത്താണ് ടാറിംഗിനോട് ചേർന്ന് വൻ കുഴി രൂപപ്പെട്ടത്.ഏതാനും വർഷംമുമ്പ് ബിഎം ആൻഡ് ബിസി നിലവാരത്തിൽ നവീകരിച്ച റോഡാണിത്.
കഴിഞ്ഞ മാസം ജൽ ജീവൻ മിഷൻ പദ്ധതിയ്ക്കായി റോഡിനടുത്ത് വെട്ടിക്കീറിയിരുന്നു. ഈ ഭാഗങ്ങളിൽ മതിയായ അളവിൽ അസംസ്കൃത വസ്തുക്കൾ ചേർക്കാതെയാണ് പൈപ്പുകൾ മൂടിയതെന്ന ആക്ഷേപം നിലനിൽക്കുന്നുണ്ട്.അപകട ഭീഷണി നിലനിൽക്കുന്നതിനാൽ ജൽ ജീവൻ മിഷൻ അധികൃതരെത്തി കുഴി നികത്തിയെങ്കിലും കാര്യക്ഷമമല്ലെന്ന് ആക്ഷേപമുണ്ട്. മതിയായ അസംസ്കൃത വസ്തുക്കളുപയോഗിച്ച് ഉറപ്പിച്ചില്ലെങ്കിൽ ടാറിംഗ് ഭാഗം ഉൾപ്പെടെ റോഡ് പൊളിയാൻ സാധ്യതയുണ്ടെന്നാണ് നാട്ടുകാർ പറയുന്നത്. എത്രയും വേഗം പ്രശനം പരിഹരിച്ച് അപകട ഭീഷണി ഒഴിവാക്കണമെന്നാണ് നാട്ടുകാർ ആവശ്യപ്പെടുന്നത്.
