തിരുവമ്പാടി: വന്യമൃഗശല്യത്തിന് ശാശ്വത പരിഹാരം കാണുക, വനം -റവന്യു വകുപ്പുകൾ സംയുക്ത സർവ്വേ നടത്തി അതിർത്തികൾ രേഖപ്പെടുത്തുക, കർഷകർക്ക് തോക്ക് ലൈസൻസ് അനുവദിക്കുക, ഭീഷണിയാകുന്ന വന്യമൃഗങ്ങളെ കൊല്ലാൻ അനുവദിക്കുക, വന്യജീവി നിയമം ഭേദഗതി ചെയ്യുക തുടങ്ങിയ ആവശ്യങ്ങൾ ഉന്നയിച്ചു ആം ആദ്മി പാർട്ടി (എഎപി) തിരുവമ്പാടി നിയോജക മണ്ഡലം കമ്മിറ്റിയുടെ നേതൃത്വത്തിൽ തിരുവന്പാടി വില്ലേജ് ഓഫീസിനു മുൻപിൽ അനിശ്ചിതകാല റിലേ സത്യഗ്രഹം ആരംഭിച്ചു.നിയോജകമണ്ഡലം കർഷക വിംഗ് പ്രസിഡന്റ് എം.എ.ജോസ് മുള്ളനാനിയിൽ അധ്യക്ഷത വഹിച്ച സമരം ജില്ലാ പ്രസിഡന്റ് അഭിലാഷ് ദാസ് ഉദ്ഘാടനം ചെയ്തു. സണ്ണി വി. ജോസഫ്, ലിൻസ് ജോർജ്ജ്, ഏബ്രഹാം വാമറ്റത്തിൽ, മനു പൈന്പള്ളിൽ, വിൻസു തിരുമല തുടങ്ങിയവർ പ്രസംഗിച്ചു.
