സൗജന്യ ഓണക്കിറ്റ് വിതരണം : സംസ്ഥാനതല ഉദ്ഘാടനം 26 ന്
സംസ്ഥാനത്തെ എല്ലാ റേഷൻ ഗുണഭോക്താക്കളും തങ്ങളുടെ അർഹമായ വിഹിതം യഥാസമയം കൈപ്പറ്റേണ്ടതാണെന്ന് ഭക്ഷ്യ പൊതുവിതരണ വകുപ്പ് മന്ത്രി ജി.ആർ. അനിൽ അറിയിച്ചു. ഓണത്തോടനുബന്ധിച്ച് വെള്ള, നീല, പിങ്ക് കാർഡുകാർക്ക് സ്പെഷ്യൽ അരി ലഭ്യമാക്കിയിട്ടുണ്ട്. നോൺ പ്രയോരിറ്റി നോൺ സബ്ലിഡി (വെള്ള കാർഡ്) വിഭാഗത്തിന് 15 കിലോഗ്രാമും നോൺ പ്രയോരിറ്റി സബ്സിഡി (നീല കാർഡ്) വിഭാഗത്തിന് 10 കിലോഗ്രാമും പി.എച്ച്.എച്ച് (പിങ്ക് കാർഡ് വിഭാഗത്തിന് 5 കിലോഗ്രാമും വീതം അരിയാണ് ഓണത്തിന് സ്പെഷ്യലായി 10.90 രൂപ നിരക്കിൽ റേഷൻ കടകൾ വഴി ലഭ്യമാക്കിയിട്ടുള്ളത്. ഓരോ വിഭാഗത്തിനും അർഹമായ പ്രതിമാസ വിഹിതത്തിന് പുറമെയാണ് ഇത് ലഭിക്കുക. ഓഗസ്റ്റ് മാസത്തിലെ വിഹിതവും സ്പെഷ്യൽ അരിയും സെപ്റ്റംബർ 4 വരെ കൈപ്പറ്റാം.
പൊതുവിപണിയിലും റേഷൻകടകളിലും ഓണക്കാലത്ത് തീവ്ര പരിശോധന നടത്താൻ ബന്ധപ്പെട്ട ഉദ്യോഗസ്ഥർക്ക് കർശന നിർദ്ദേശം നൽകിയിട്ടുണ്ട്. ക്രമക്കേടുകളോ തിരിമറികളോ മറ്റ് വിധത്തിലുള്ള നിയമലംഘനങ്ങളോ കണ്ടെത്തുകയാണെങ്കിൽ കർശനമായ നടപടികൾ സ്വീകരിക്കുമെന്ന് മന്ത്രി അറിയിച്ചു.
സൗജന്യ ഓണക്കിറ്റ് വിതരണം : സംസ്ഥാനതല ഉദ്ഘാടനം 26 ന്
കേരള സർക്കാർ എ.എ.വൈ റേഷൻ കാർഡ് ഉടമകൾക്കും ക്ഷേമ സ്ഥാപനങ്ങളിലെ അന്തേവാസികൾക്കും നൽകുന്ന സൗജന്യ ഓണക്കിറ്റ് വിതരണത്തിന്റെ സംസ്ഥാനതല ഉദ്ഘാടനം ആഗസ്റ്റ് 26ന് രാവിലെ 9.30 ന് തിരുവനന്തപുരം ജില്ലാ പഞ്ചായത്ത് ഹാളിൽ ഭക്ഷ്യ പൊതുവിതരണ വകുപ്പ് മന്ത്രി ജി.ആർ.അനിൽ നിർവഹിക്കും. വി.കെ. പ്രശാന്ത് എം.എൽ.എ അദ്ധ്യക്ഷത വഹിക്കും. മേയർ ആര്യ രാജേന്ദ്രൻ, ജില്ലാ പഞ്ചായത്ത് പ്രസിഡന്റ് ഡി. സുരേഷ് കുമാർ, ഡെപ്യൂട്ടി മേയർ പി.കെ.രാജു, ജില്ലാ പഞ്ചായത്ത് ക്ഷേമകാര്യ സ്റ്റാന്റിംഗ് കമ്മിറ്റി ചെയർമാൻ വിളപ്പിൽ രാധാകൃഷ്ണൻ, പൊതുവിതരണ ഉപഭോക്തൃകാര്യ കമ്മീഷണർ ഹിമ കെ സപ്ലൈകോ തിരുവനന്തപുരം റീജിയണൽ മാനേജർ സ്മിത എസ്.ആർ തുടങ്ങിയവർ പങ്കെടുക്കും.
പഞ്ചസാര, വെളിച്ചെണ്ണ, തുവര പരിപ്പ്, ചെറുപയർ പരിപ്പ്, വൻ പയർ, കശുവണ്ടി, മിൽമ നെയ്യ്, ഗോൽഡ് ടീ, പായസം മിക്സ്, സാമ്പാർ പൊടി, മുളകുപൊടി, മഞ്ഞൾപൊടി, മല്ലിപ്പൊടി, ഉപ്പ് തുടങ്ങിയ 14 ഇനം അവശ്യ വസ്തുക്കൾ അടങ്ങിയ ഓണക്കിറ്റാണ് വിതരണം ചെയ്യുന്നത്. ഓണത്തിനു മുമ്പ് മുഴുവൻ എ.എ.വൈ കാർഡ് ഉടമകൾക്കും ക്ഷേമ സ്ഥാപനങ്ങളിലെ അന്തേവാസികൾക്കും കിറ്റ് ലഭ്യമാക്കുന്നതിനുള്ള നടപടികൾ ഭക്ഷ്യപൊതുവിതരണ വകുപ്പ് സ്വീകരിച്ചിട്ടുണ്ട്.
