കാരശ്ശേരിയിൽ ഷിഗല്ല സ്ഥിരീകരിച്ചു; ജാഗ്രതാ നിർദ്ദേശവുമായി ആരോഗ്യവകുപ്പ്.
മുക്കം: കാരശ്ശേരി ഗ്രാമപഞ്ചായത്തിലെ എട്ടാം വാർഡിൽ (ആലി) ഷിഗല്ല രോഗം റിപ്പോർട്ട് ചെയ്ത പശ്ചാത്തലത്തിൽ പ്രദേശത്ത് ആരോഗ്യവകുപ്പ് ജാഗ്രതാ നിർദ്ദേശം പുറപ്പെടുവിച്ചു. പനി, കടുത്ത വയറിളക്കം തുടങ്ങിയ ലക്ഷണങ്ങൾ കണ്ടാൽ പൊതുജനങ്ങൾ ഉടനടി വൈദ്യസഹായം തേടണമെന്ന് കാരശ്ശേരി മെഡിക്കൽ ഓഫീസർ അറിയിച്ചു.രോഗവ്യാപനം തടയുന്നതിനായി ആരോഗ്യവകുപ്പിന്റെ നേതൃത്വത്തിൽ പ്രതിരോധ പ്രവർത്തനങ്ങൾ ഊർജിതമാക്കിയിട്ടുണ്ട്. യാതൊരു കാരണവശാലും പൊതുജനങ്ങൾ സ്വയംചികിത്സയ്ക്ക് മുതിരരുതെന്നും നിർദ്ദേശമുണ്ട്.
പ്രധാന പ്രതിരോധ നിർദ്ദേശങ്ങൾ:
കൈകൾ വൃത്തിയായി സൂക്ഷിക്കുക: ഭക്ഷണത്തിന് മുൻപും ടോയ്ലറ്റിൽ പോയതിന് ശേഷവും കൈകൾ സോപ്പ് ഉപയോഗിച്ച് നന്നായി കഴുകുക.
തിളപ്പിച്ച വെള്ളം മാത്രം: കുടിക്കാൻ എപ്പോഴും തിളപ്പിച്ചു ആറിയ വെള്ളം മാത്രം ഉപയോഗിക്കുക.
കിണറുകൾ ക്ലോറിനേഷൻ നടത്തുക: പ്രദേശlത്തെ കുടിവെള്ള സ്രോതസ്സുകളും കിണറുകളും എത്രയും വേഗം ക്ലോറിനേഷൻ നടത്തി സുരക്ഷിതമാക്കേണ്ടതാണ്.
പ്രത്യേകം ശ്രദ്ധിക്കുക: വയറിളക്ക രോഗങ്ങൾ പടരാൻ സാധ്യതയുള്ളതിനാൽ ഭക്ഷണ സാധനങ്ങൾ എപ്പോഴും അടച്ചുവെച്ച് സൂക്ഷിക്കുക. പഴകിയതും തുറന്നുവെച്ചതുമായ ഭക്ഷണങ്ങൾ പൂർണ്ണമായും ഒഴിവാക്കുക.
