പാർലമെന്ററി ജനാധിപത്യ മാതൃകയിൽ വിദ്യാലയ പാർലമെന്റ് തെരഞ്ഞെടുപ്പ്.
കോടഞ്ചേരി: വേളംകോട് സെന്റ് ജോർജസ് ഹയർ സെക്കൻഡറി വിദ്യാലയത്തിൽ പാർലമെന്ററി ജനാധിപത്യ മാതൃകയിൽ വിദ്യാലയ പാർലമെന്റ് തെരഞ്ഞെടുപ്പ് സംഘടിപ്പിച്ചു. വിദ്യാർത്ഥികളിൽ ജനാധിപത്യ അവബോധവും നേതൃത്വശേഷിയും വളർത്തുക എന്ന ലക്ഷ്യത്തോടെയാണ് തെരഞ്ഞെടുപ്പ് നടത്തിയത്.
തെരഞ്ഞെടുപ്പിൽ രണ്ടാം വർഷ ശാസ്ത്ര വിഭാഗം വിദ്യാർത്ഥി നീവ് എസ്. എബ്രഹാം വിദ്യാലയ നേതാവായി തെരഞ്ഞെടുക്കപ്പെട്ടു. ഒന്നാം വർഷ വാണിജ്യ വിഭാഗം വിദ്യാർത്ഥി അഹമ്മദ് സിയാൻ പി. പി. കായികകാര്യ സെക്രട്ടറിയായും, രണ്ടാം വർഷ വാണിജ്യ വിഭാഗം വിദ്യാർത്ഥിനി സ്നേഹ സെബാസ്റ്റ്യൻ കലാകാര്യ സെക്രട്ടറിയായും തെരഞ്ഞെടുക്കപ്പെട്ടു.
ക്ലാസ് നേതാക്കളായി ജിൽന തെരേസ് വിനോദ് (പന്ത്രണ്ടാം ക്ലാസ് ശാസ്ത്ര വിഭാഗം), ടെസ്സ സാറ നെൽസൺ (പതിനൊന്നാം ക്ലാസ് ശാസ്ത്ര വിഭാഗം), സ്നേഹ സെബാസ്റ്റ്യൻ (പന്ത്രണ്ടാം ക്ലാസ് വാണിജ്യ വിഭാഗം), അഹമ്മദ് സിയാൻ പി. പി. (പതിനൊന്നാം ക്ലാസ് വാണിജ്യ വിഭാഗം) എന്നിവർ തെരഞ്ഞെടുക്കപ്പെട്ടു.
വരണാധികാരി സീമ സി. ആറിന്റെ നേതൃത്വത്തിൽ ‘സ്ഥാനാർത്ഥി പരിചയ പരിപാടി’, വോട്ടെടുപ്പ്, വോട്ടെണ്ണൽ, ഫലപ്രഖ്യാപനം തുടങ്ങിയ നടപടിക്രമങ്ങൾ പാർലമെന്ററി ജനാധിപത്യ രീതിയിൽ സംഘടിപ്പിച്ചു. തുടർന്ന് തെരഞ്ഞെടുക്കപ്പെട്ട വിദ്യാർത്ഥി പ്രതിനിധികൾ വിദ്യാലയ സഭയിൽ സത്യപ്രതിജ്ഞ ചെയ്ത് അധികാരമേറ്റു.
വിദ്യാലയത്തിലെ മുഴുവൻ വിദ്യാർത്ഥികളുടെയും സജീവ പങ്കാളിത്തം ഉറപ്പാക്കിയാണ് തെരഞ്ഞെടുപ്പ് നടത്തിയത്. ജനാധിപത്യ മൂല്യങ്ങൾ, ഉത്തരവാദിത്തബോധം, നേതൃത്വഗുണങ്ങൾ എന്നിവ വിദ്യാർത്ഥികളിൽ വളർത്തുന്നതിന് മാതൃകാപരമായ രീതിയിലാണ് തെരഞ്ഞെടുപ്പ് സംഘടിപ്പിച്ചത്.
