കോടഞ്ചേരി: പഞ്ചായത്തിലെ ഭൂമിയുള്ള ഭവനരഹിതരായ 336 കുടുംബങ്ങൾക്ക് സ്വന്തമായ ഒരു പാർപ്പിടം നിർമിക്കാൻ ആവശ്യമായ സാമ്പത്തിക സഹായം നൽകുന്നതിനായി കോടഞ്ചേരി പഞ്ചായത്ത് ഹഡ്കോയിൽ നിന്നും രണ്ടരക്കോടി രൂപ ലോണെടുത്ത് ഗുണഭോക്താക്കൾ വിവിധ ഘട്ടങ്ങളായി നൽകുവാൻ പഞ്ചായത്ത് ഭരണസമിതി തീരുമാനിച്ചു.ലൈഫ് ഭവന പദ്ധതിയിൽ ഉൾപ്പെട്ട ഗുണഭോക്താക്കൾക്ക് സംസ്ഥാന സർക്കാർ വിഹിതമായി ഒരു ലക്ഷം രൂപയാണ് ലഭിക്കുന്നത്.
ബാക്കിവരുന്ന മൂന്നുലക്ഷം രൂപ തദ്ദേശ സ്വയംഭരണ സ്ഥാപനങ്ങളുടെ പദ്ധതി വിഹിതത്തിന്റെ നിർബന്ധിത വകയിരുത്തലായ ഇരുപത് ശതമാനം ഉപയോഗിച്ചുകൊണ്ടും കുറവുള്ള തുക സർക്കാർ ഗ്യാരണ്ടിയിൽ ഹഡ്കോയിൽ നിന്നും പലിശരഹിത വായ്പയായി ലഭ്യമാക്കിയുമാണ് പദ്ധതി നടപ്പിലാക്കുന്നത്.നിലവിൽ ലൈഫ് 2020 ഭവന പദ്ധതിക്ക് വേണ്ടി പഞ്ചായത്ത് 1,94,53,454 രൂപ ചെലവഴിച്ചിട്ടുണ്ട്.
കോടഞ്ചേരി പഞ്ചായത്തിൽ നിലവിൽ 101 വീടുകളുടെ നിർമാണം വിവിധ ഘട്ടങ്ങളിലായി പുരോഗമിച്ചു വരുന്നു. രണ്ടാംഘട്ടമായി 50 വീടുകൾ കൂടി ഉടനെ എഗ്രിമെന്റ് വച്ച് നിർമാണ പ്രവർത്തകർ ആരംഭിക്കുന്നതാണ്. ഒന്നാംഘട്ടത്തിൽ നിർമാണം പൂർത്തീകരിച്ച 12 വീടുകളിൽ മൂന്നെണ്ണത്തിന്റെ താക്കോൽദാനം പതിനെട്ടാം വാർഡിൽ തെയ്യപ്പാറയിൽ വച്ച് പഞ്ചായത്ത് പ്രസിഡന്റ് അലക്സ് തോമസ് ചെമ്പകശേരി ഗുണഭോക്താക്കൾക്ക് താക്കോൽ നൽകി നിർവഹിച്ചു.
