തിരുവമ്പാടി: മുസ്ലിം ലീഗ് പോഷക സംഘടനയായ കെഎംസിസിയുടെ പരിപാടിയിലേക്ക് നിലമ്പൂർ ഉപതെരഞ്ഞെടുപ്പിൽ സ്വതന്ത്ര സ്ഥാനാർത്ഥിയായി മത്സരിക്കുന്ന തൃണമൂൽ കോൺഗ്രസ് നേതാവ് പി വി അൻവറിനും ക്ഷണം. തിരുവമ്പാടിയിൽ സംഘടിപ്പിക്കുന്ന കുടുംബ സംഗമത്തിലാണ് പി വി അൻവർ പങ്കെടുക്കുന്നത്.
മുസ്ലിം ലീഗ് സംസ്ഥാന സെക്രട്ടറി സി പി ചെറിയ മുഹമ്മദ്, കോൺഗ്രസ് ജില്ലാ പഞ്ചായത്ത് അംഗം ബോസ് ജേക്കബ് തുടങ്ങിയവരും പങ്കെടുക്കുന്നവരുടെ പട്ടികയിലുണ്ട്. ജിസിസി – കെഎംസിസി തിരുവമ്പാടി പഞ്ചായത്ത് കമ്മറ്റിയാണ് നാളെ പരിപാടി സംഘടിപ്പിക്കുന്നത്. നാളെ നടക്കുന്ന പരിപാടിയുമായി മുസ്ലിം ലീഗിന് ബന്ധമില്ലെന്നാണ് മുസ്ലിം ലീഗ് നേതൃത്വം വിശദീകരിക്കുന്നത്. പരിപാടിയിൽ പങ്കെടുക്കരുതെന്ന നിർദേശം നേതാക്കൾക്ക് നൽകിയിട്ടുണ്ടെന്നും ലീഗ് തിരുവമ്പാടി നിയോജക മണ്ഡലം കമ്മറ്റി അറിയിച്ചു.
തിരുവമ്പാടി പഞ്ചായത്തിൽ രാഷ്ട്രീയബന്ധങ്ങൾക്കപ്പുറം നാട്ടിലെ സാധാരണക്കാരായ ജനങ്ങൾക്ക് ഉപകാരപ്രദമായ പുന്നക്കൽ കുടിവെള്ള പദ്ധതി ഉൾപ്പെടെ നിരവധി ജീവകാരുണ്യ പ്രവർത്തനങ്ങൾ നടത്തി വരുന്ന ജി.സി.സി കെ.എം സി സി സംഘടിപ്പിക്കുന്ന കുടുംബ സംഗമം രാഷ്ട്രീയ വിവാദങ്ങൾക്ക് തിരികൊളുത്താൻ ഉപയോഗിക്കുന്നതിനോട് യോജിപ്പില്ലെന്നും, നാട്ടിലെ ജനങ്ങൾക്ക് ഉപകാരപ്രദമായ സേവനങ്ങൾ ലക്ഷ്യം വെച്ചാണ് നാളെ കുടുംബ സംഗമം നടക്കുന്നതെന്നും വിവാദങ്ങൾ തള്ളി കളഞ്ഞ് എല്ലാവരും പരിപാടിയിൽ പങ്കെടുക്കണമെന്നും ജി.സി.സി. കെ.എം.സി.സി പഞ്ചായത്ത് നേതാക്കൾ അറിയിച്ചു
