മുക്കം:കഴിഞ്ഞ കാൽ നൂറ്റാണ്ടിലേറെയായി ഭിന്നശേഷിക്കാരുടെ ജീവിതത്തിൽ പ്രതീക്ഷ നൽകുന്ന മഹത്തായ സേവനങ്ങൾക്ക് പൊതുജനം സാക്ഷിയാണ്. മുതിർന്ന കുട്ടികൾക്ക് ആത്മവിശ്വാസം നൽകുന്ന “ഉപജീവനം ” പദ്ധതിപ്രകാരം ആദ്യഘട്ടം തിരഞ്ഞെടുത്ത മുപ്പതോളം കുട്ടികൾക്ക് കോഴിയും കൂടും, ആട് എന്നിവ നൽകിയാണ് തുടങ്ങിയത്. വലിയ വിജയമായിരുന്ന ഈ പദ്ധതിക്കുശേഷം ഇവരുടെ തൊഴിൽ പരിശീലനകേന്ദ്രത്തിൽ നിർമ്മിക്കുന്ന ഉത്പന്നങ്ങൾ പൊതുജനങ്ങളിൽ പ്രചരിപ്പിക്കാനും വിറ്റഴിക്കാനും ഉദ്ദേശിച്ചുകൊണ്ട് പെട്ടിക്കട തുടങ്ങിയിരിക്കുകയാണിവർ. സ്കൂളിന്റെ തുടക്കം മുതൽ ഈ കുട്ടികൾക്കൊപ്പം ജീവിക്കുന്ന പ്രതീക്ഷയുടെ പി ആർ ഒ ടി പ്രഭാകരന്റെ നേതൃത്വത്തിൽ നടക്കുന്ന”ഉപജീവന”ത്തിന്റെ പെട്ടിക്കടയുടെ ഉദ്ഘാടനം സാക്ഷാൽ ലിന്റോ ജോസഫ് എം എൽ എ എത്തിയത് കുട്ടികൾക്കും ജീവനക്കാർക്കും ആവേശമായി. ഹെഡ്മിസ്ട്രെസ്സ് കെ ഷീബയുടെ അധ്യക്ഷതയിൽ നടന്ന പരിപാടിയിൽ സ്കൂൾ കമ്മിറ്റി സെക്രട്ടറി പി പി പ്രദീപ് കുമാർ, മാനേജർ സി ഹാരിസ്, പി ടി എ പ്രസിഡന്റ് അസീസ് മലയമ്മ, തൊഴിൽപരിശീലകാരായ ഉഷ കെ സി, അനിത കെ, രജി കെ പുഷ്പവല്ലി സി എന്നിവർ സംസാരിച്ചു.
