തിരുവമ്പാടി : കക്കാടംപൊയിലിൽ ജനവാസകേന്ദ്രങ്ങളിൽ കാട്ടാനയിറങ്ങി. അങ്ങാടിയിൽനിന്നും 500 മീറ്റർ അകലെ ഗീവർഗീസ് നഗറിൽ ആണ് ഒറ്റയാൻ ഇറങ്ങിയത്. വെള്ളിയാഴ്ച രാത്രി 8.30-നാണ് നാട്ടുകാർ ആനയെ കണ്ടത്. വലിയ ശബ്ദം പുറപ്പെടുവിച്ചു അകറ്റുകയായിരുന്നു. വനതിർത്തിയോട് ചേർന്ന സ്ഥലമാണിത്. ഈ ഭാഗത്ത് ആദ്യമാണ് ആനയിറങ്ങുന്നതെന്നു നാട്ടുകാർ പറഞ്ഞു.
ക്രിസ്മസ് കാരൾ നടക്കുന്നത് കാരണം ധാരാളംപേർ രാത്രി ഈ മേഖലയിൽ തമ്പടിച്ചിരുന്നു. ഇതിനിടെ കാട്ടാന എത്തിയത് ജനത്തെ പരിഭ്രാന്തരാക്കി. കഴിഞ്ഞ മാസം കോനൂർകണ്ടിയിൽ കാട്ടാനകൾ ഇറങ്ങി ഒട്ടേറെ വാഹനങ്ങൾ തകർത്തിരുന്നു. പീടികപ്പാറ, തേനരുവി ഉൾപ്പെടെ ജനവാസ കേന്ദ്രങ്ങളിലും ആനയിറങ്ങി വ്യാപകമായി കൃഷി നശിപ്പിച്ചിരുന്നു
