മുക്കം: നവകേരളസദസ്സിന്റെ പ്രഭാതയോഗത്തിലെ ഏറ്റവും പ്രായം കുറഞ്ഞ അതിഥിയായി തോട്ടുമുക്കം സ്വദേശിനി റന ഫാത്തിമ. തിരുവമ്പാടി, കൊടുവള്ളി, കുന്ദമംഗലം, ബേപ്പൂർ മണ്ഡലകളിൽനിന്ന് യോഗത്തിലേക്ക് ക്ഷണിക്കപ്പെട്ടവരിലെ ഏറ്റവും പ്രായം കുറഞ്ഞ അതിഥിയാണ് തോട്ടുമുക്കം ഗവ. യു.പി. സ്കൂളിലെ യു.കെ.ജി. വിദ്യാർഥിയായ ഈ അഞ്ചുവയസ്സുകാരി. നാലാംവയസ്സിൽ ഇരുവഴിഞ്ഞിപ്പുഴയ്ക്ക് കുറുകെ നീന്തിയ റന ഫാത്തിമ മുക്കം നഗരസഭയുടെ ‘നീന്തി വാ മക്കളെ’ പദ്ധതിയുടെ ബ്രാൻഡ് അംബാസഡറാണ്. മുങ്ങിമരണങ്ങൾ ഇല്ലാതാക്കാൻ നാട്ടിൽ ഒരു നീന്തൽ പരിശീലനകേന്ദ്രം വേണമെന്ന നിവേദനവുമായാണ് റന മുഖ്യമന്ത്രിയെ കാണാൻ ഒരുങ്ങുന്നത്
