മക്കളെ സാക്ഷി നിര്ത്തി ഷുക്കൂര് വക്കീലും ഷീനയും രണ്ടാമതും വിവാഹിതരായി. നടനും അഭിഭാഷകനുമായ ഷുക്കൂറും കണ്ണൂര് സര്വകലാശാല നിയമവകുപ്പ് മേധാവിയുമായ ഷീനയും ഹൊസ്ദുര്ഗ് സബ് രജിസ്ട്രാര് കാര്യാലയത്തില് സ്പെഷ്യല് മാര്യേജ് ആക്ട് പ്രകാരമാണ് വിവാഹിതരായത്. ഷുക്കൂറിന്റേയും ഷീനയുടേയും മൂന്ന് പെണ്മക്കളും മാതാപിതാക്കളുടെ രണ്ടാം വിവാഹത്തിന് സാക്ഷിയാകാന് എത്തിയിരുന്നു. പെണ്മക്കളുടെ അവകാശസംരക്ഷണത്തിനാണെന്ന് പ്രഖ്യാപിച്ചുകൊണ്ടായിരുന്നു മുസ്ലിം മതാചാര പ്രകാരം ആദ്യം വിവാഹിതരായ ഇരുവരും സ്പെഷ്യല് മാര്യേജ് ആക്ട് പ്രകാരം വീണ്ടും വിവാഹിതരായത്. കാഞ്ഞങ്ങാട് ആറങ്ങാടി ‘മെറാക്കി’ലെ ഷുക്കൂറും പാലക്കാട് പുതുപ്പരിയാരത്തെ ഷീനയും 1994 ഒക്ടോബര് ആറിനാണ് പാണക്കാട് ഹൈദരലി ശിഹാബ് തങ്ങളുടെ കാര്മികത്വത്തില് നിക്കാഹ് കഴിച്ചത്.
മുസ്ലിം പിന്തുടര്ച്ചാ നിയമപ്രകാരം ആണ്മക്കളുണ്ടെങ്കിലേ മുഴുവന് സ്വത്തും കൈമാറാനാകൂ. ഷൂക്കൂറിനും ഷീനയ്ക്കും മൂന്ന് പെണ്മക്കളായതിനാല് സ്വത്തിന്റെ മൂന്നില്രണ്ട് ഓഹരി മാത്രമാണ് മക്കള്ക്ക് കിട്ടുക. ബാക്കി സഹോദരങ്ങള്ക്ക് അവകാശപ്പെട്ടതാണ്. ഈ പ്രതിസന്ധി മറികടക്കാനാണ് സ്പെഷ്യല് മാര്യേജ് ആക്ട് പ്രകാരം ഇരുവരും വീണ്ടും വിവാഹിതരായത്.
