മുക്കം: നഗരസഭ പരിധിയിൽ കഴിഞ്ഞ അധ്യയന വർഷത്തെ വിവിധ പരീക്ഷകളിൽ ഉന്നത വിജയം കൈവരിച്ച വിദ്യാർത്ഥികളെയും 100% വിജയം കൈവരിച്ച വിദ്യാലയങ്ങളെയും മുക്കം നഗരസഭയുടെ നേതൃത്വത്തിൽ അനുമോദിച്ചു. ‘പ്രതിഭാസംഗമം’ എന്ന പേരിൽ സംഘടിപ്പിച്ച അനുമോദന ചടങ്ങിൽ വെച്ച് നഗരസഭാ പരിധിയിലെ വിദ്യാലയങ്ങളിൽ നിന്നും എല്ലാ വിഷയങ്ങളിലും എ പ്ലസ് നേടിയ എസ് എസ് എൽ സി, പ്ലസ് ടു വിദ്യാർത്ഥികൾ, എൽ.എസ്.എസ്, യു.എസ്.എസ് സ്കോളർഷിപ്പ് ജേതാക്കൾ, 100% വിജയം നേടിയ ചേന്നമംഗല്ലൂർ, മുക്കം, മുക്കം ഓർഫനേജ് ഹയർ സെക്കന്ററി വിദ്യാലയങ്ങൾ എന്നിവരെയാണ് ഉപഹാരം നൽകി ആദരിച്ചത്.
മുക്കം ഒ എസ് എ ഓഡിറ്റോറിയത്തിൽ വെച്ച് നടന്ന ചടങ്ങിൽ നൂറുകണക്കിന് വിദ്യാർത്ഥികളും രക്ഷിതാക്കളും പങ്കെടുത്തു.നഗരസഭാ അധ്യക്ഷ അഡ്വ. കെ. പി ചാന്ദ്നി പരിപാടിയുടെ ഔദ്യോഗിക ഉദ്ഘാടനം നിർവഹിച്ചു.ഡെപ്യൂട്ടി ചെയർപേഴ്സൺ സി എ പ്രദീപ്കുമാർ ചടങ്ങില് അധ്യക്ഷത വഹിച്ചു. വിവിധ സ്റ്റാന്റിംഗ് കമ്മറ്റി ചെയര്പേഴ്സണ്മാരായ മനീഷ ഉള്ളാട്ടിൽ, അബ്ദുള് അസീസ് വാര്പ്പില്, ബിന്ദു. കെ.പി, ഭവന വിനോദ്, റാഷിദ് കുന്നത്ത് കൗണ്സിലര്മാരായ ബബിത മനോജ്, മുഹമ്മദ് നസീം തുടങ്ങിയവർ സംസാരിച്ചു.
