ഫുട്ബോൾ ആവേശത്തിനൊപ്പം ലഹരിവിരുദ്ധ സന്ദേശവുമായി വേളംകോട് സ്കൂളിൽ ‘PASSION 2K26.
കോടഞ്ചേരി: വേളംകോട് വിദ്യാർത്ഥികളിൽ കായിക സംസ്കാരം വളർത്തുന്നതിനൊപ്പം ലഹരിക്കെതിരെയുള്ള പോരാട്ടം ശക്തമാക്കുക എന്ന ലക്ഷ്യത്തോടെ വേളംകോട് സെന്റ് ജോർജ്സ് ഹയർ സെക്കൻഡറി സ്കൂളിൽ “PASSION 2K26” ഫുട്ബോൾ ഫാൻസ് ആഘോഷവും ലഹരിവിരുദ്ധ ബോധവൽക്കരണ റാലിയും സംഘടിപ്പിച്ചു. സ്കൂൾ എൻ.എസ്.എസ്., സ്കൗട്ട് ആൻഡ് ഗൈഡ്സ് യൂണിറ്റുകളുടെ നേതൃത്വത്തിൽ നടന്ന പരിപാടി കായികാവേശവും സാമൂഹിക പ്രതിബദ്ധതയും ഒരുപോലെ ഉയർത്തിപ്പിടിക്കുന്നതായിരുന്നു.ഉച്ചയ്ക്ക് 2.15-ന് ഹയർ സെക്കൻഡറി വിഭാഗത്തിൽ നിന്നാരംഭിച്ച ലഹരിവിരുദ്ധ റാലിയിൽ വിദ്യാർത്ഥികൾ തങ്ങളുടെ പ്രിയപ്പെട്ട ഫുട്ബോൾ ക്ലബ്ബുകളുടെ ജേഴ്സികളണിഞ്ഞ് ആവേശപൂർവം പങ്കെടുത്തു.
“Say No to Drugs”, “Choose Sports, Choose Life” തുടങ്ങിയ ലഹരിവിരുദ്ധ സന്ദേശങ്ങൾ ആലേഖനം ചെയ്ത പ്ലക്കാർഡുകളും വിവിധ രാജ്യങ്ങളുടെ വർണാഭമായ പതാകകളും പ്രിയ ഫുട്ബോൾ താരങ്ങളുടെ ചിത്രങ്ങളും ഏന്തിയായിരുന്നു വിദ്യാർത്ഥികളുടെ മാർച്ച്.റാലി വേളംകോട് സ്കൂൾ ജംഗ്ഷനിലെത്തിയപ്പോൾ എൽ.പി., യു.പി., ഹൈസ്കൂൾ, ഹയർ സെക്കൻഡറി വിഭാഗങ്ങളിലെ വിദ്യാർത്ഥികൾ, അധ്യാപകർ, അനധ്യാപകർ, പ്രദേശവാസികൾ, വ്യാപാരി സമൂഹം തുടങ്ങിയവർ പങ്കുചേർന്ന് പരിപാടിയെ ജനകീയമാക്കി.തുടർന്ന് ലഹരിമുക്ത സമൂഹസൃഷ്ടിക്കായി ആരോഗ്യകരമായ ജീവിതശൈലി പ്രോത്സാഹിപ്പിക്കുമെന്ന് പ്രഖ്യാപിച്ചുകൊണ്ട് വിദ്യാർത്ഥികൾ കൂട്ടായ ലഹരിവിരുദ്ധ പ്രതിജ്ഞയെടുത്തു. എൻ.എസ്.എസ്. വോളണ്ടിയർ ആൻ മരിയ ജസ്റ്റിൻ പ്രതിജ്ഞ ചൊല്ലിക്കൊടുത്തു. പി.ടി.എ. പ്രസിഡന്റ് റൂബി മാർക്കോസ്, സ്കൂൾ ഹെഡ്മിസ്ട്രസ് സി. മെൽവിൻ, എസ്.ഐ.സി., അധ്യാപകർ, അനധ്യാപകർ എന്നിവർ ചടങ്ങിൽ സജീവമായി പങ്കെടുത്തു.റാലിക്ക് ശേഷം ഹയർ സെക്കൻഡറി വിദ്യാർത്ഥികൾക്കായി സംഘടിപ്പിച്ച “PASSION 2K26” ആഘോഷങ്ങൾ ക്യാമ്പസിനെ ആവേശഭരിതമാക്കി.
നാസിക് ദോൽ വാദ്യത്തിന്റെ അകമ്പടിയോടെ നടന്ന സംഗീത-നൃത്ത പരിപാടികൾ, ഫുട്ബോൾ ഷൂട്ടൗട്ട് മത്സരം, പ്രവചന മത്സരം, ഫുട്ബോൾ ഫാൻസ് ഫോട്ടോ സെഷൻ എന്നിവ ആഘോഷങ്ങൾക്ക് മാറ്റുകൂട്ടി.PASSION 2K26 ന്റെ ഭാഗമായി സംഘടിപ്പിച്ച ഫുട്ബോൾ ഷൂട്ടൗട്ട് മത്സരത്തിൽ പ്ലസ് ടു സയൻസ് വിഭാഗത്തിൽ നിന്ന് ലൂയിസ് മാർട്ടിൻ, അനാമിക സുനിൽ എന്നിവരും പ്ലസ് ടു കൊമേഴ്സ് വിഭാഗത്തിൽ നിന്ന് ആദിൽ ഷാൻ, ജിയോണ ഷാജി എന്നിവരും മികച്ച പ്രകടനം കാഴ്ചവെച്ച് സമ്മാനം കരസ്ഥമാക്കി.ഫുട്ബോൾ ആരാധനയെയും സാമൂഹിക പ്രതിബദ്ധതയെയും മനോഹരമായി കോർത്തിണക്കിയ “PASSION 2K26” വിദ്യാർത്ഥികൾക്ക് നവ്യമായ അനുഭവമാണ് സമ്മാനിച്ചത്.
കായികമൂല്യങ്ങൾ ഉയർത്തിപ്പിടിക്കുന്നതോടൊപ്പം ലഹരിക്കെതിരെയുള്ള ശക്തമായ സന്ദേശം സമൂഹത്തിലേക്ക് എത്തിക്കാനും പരിപാടിയിലൂടെ സാധിച്ചതായി സ്കൂൾ അധികൃതർ അറിയിച്ചു.പരിപാടിക്ക് സ്കൂൾ എൻ.എസ്.എസ്., സ്കൗട്ട് ആൻഡ് ഗൈഡ്സ് യൂണിറ്റുകൾ, അധ്യാപകർ, അനധ്യാപകർ, വിദ്യാർത്ഥികൾ എന്നിവർ നേതൃത്വം നൽകി.
