ഇന്ദിരാജി സ്നേഹ ഭവനം: നാലാമത്തെ വീട് തിരുവമ്പാടി മണ്ഡലത്തിൽ.
റിയാദ്: കോഴിക്കോട് ജില്ലാ റിയാദ് ഒ.ഐ.സി.സി.യുടെ നേതൃത്വത്തിൽ നിർധന കുടുംബങ്ങൾക്ക് വീട് നിർമ്മിച്ച് നൽകുന്ന “ഇന്ദിരാജി സ്നേഹ ഭവനം” പദ്ധതിയുടെ നാലാമത്തെ വീട് തിരുവമ്പാടി മണ്ഡലത്തിൽ നിർമ്മിക്കും. ജില്ലയിലെ 13 മണ്ഡലങ്ങളിലെയും അർഹരായ കുടുംബങ്ങളെ കണ്ടെത്തി അവർക്ക് ഭവനം ഒരുക്കുക എന്ന ലക്ഷ്യത്തോടെയാണ് പദ്ധതി നടപ്പാക്കുന്നത്.
പദ്ധതിയുടെ ഭാഗമായി ഇതിനകം മൂന്ന് വീടുകളുടെ നിർമ്മാണം പൂർത്തിയാക്കി ഗുണഭോക്താക്കൾക്ക് കൈമാറിയിട്ടുണ്ട്. നാലാമത്തെ വീടിന്റെ നിർമ്മാണത്തിന് തിരുവമ്പാടി മണ്ഡലത്തെ തെരഞ്ഞെടുത്തതിന്റെ ഭാഗമായി വീടിന്റെ രൂപരേഖ പാലക്കാട് എം.പി. വി.കെ. ശ്രീകണ്ഠന് ഒ.ഐ.സി.സി. കോഴിക്കോട് ജില്ലാ പ്രസിഡന്റ് ഒമർ ഷരീഫ് കൈമാറി. ഡി മോറ പാലസിൽ നടന്ന ചടങ്ങിലായിരുന്നു രൂപരേഖ കൈമാറ്റം.
ഒ.ഐ.സി.സി. സെൻട്രൽ കമ്മിറ്റി ഭാരവാഹികളായ സലീം കളക്കര, നവാസ് വെള്ളിമാടുകുന്ന്, അബ്ദുൽ കരീം കൊടുവള്ളി, അശ്റഫ് മേച്ചേരി, മുഹമ്മദലി മണ്ണാർക്കാട്, ഷുക്കൂർ ആലുവ, ഷംനാദ് കരുനാഗപ്പള്ളി, സുരേഷ് ശങ്കർ എന്നിവരും ജില്ലാ ഭാരവാഹികളായ ജംഷീദ് ചെറുവണ്ണൂർ, റഫീഖ് എരഞ്ഞിമാവ്, മജു സിവിൽ സ്റ്റേഷൻ, റിയാസ് ആസാദ്, സൻജീർ കോലിയോട്ട്, അബ്ദുൽ അസീസ്, സിദ്ധീഖ് പന്നിയങ്കര,ജോൺ കക്കയം, നാസർ മാവൂർ, മുജീബ് കൂടരഞ്ഞി എന്നിവരും ചടങ്ങിൽ സംബന്ധിച്ചു.
ജില്ലയിലെ മറ്റ് മണ്ഡലങ്ങളിലെയും അർഹരായ കുടുംബങ്ങളെ കണ്ടെത്തുന്നതിനുള്ള പ്രവർത്തനങ്ങൾ പുരോഗമിക്കുകയാണെന്ന് ഒ.ഐ.സി.സി. ഭാരവാഹികൾ അറിയിച്ചു.
