താമരശ്ശേരി ചുരത്തില് നാളെ ഗാതാഗത നിയന്ത്രണം; രാത്രിയില് ആംബുലന്സ് ഒഴികെയുള്ള വാഹനങ്ങള് കടത്തിവിടില്ല ഗതാഗത ക്രമീകരണങ്ങൾ ഇങ്ങനെ
താമരശ്ശേരി: അടിവാരത്ത് നിര്ത്തിയിട്ടിരിക്കുന്ന ഇന്ഡസ്ട്രിയല് ഫില്ട്ടര് ഇന്റര് ചേംബര് കയറ്റിയ എച്ച്.ജി.ബി ഗൂണ്സ് ട്രക്കുകള് നാളെ (വ്യാഴം) രാത്രി 11 മണിക്ക് താമരശ്ശേരി ചുരം വഴി വയനാട്ടിലൂടെ കര്ണാടകയിലെ നഞ്ചന്കോട്ടിലേക്ക് കടന്നുപോകാന് കോഴിക്കോട് ജില്ലാ ഭരണകൂടം അനുമതി നല്കിയ സാഹചര്യത്തില് വയനാട് ജില്ലയില് ഗതാഗത ക്രമീകരണങ്ങള് ഏര്പ്പെടുത്തിയതായി ജില്ലാ പൊലീസ് മേധാവി അറിയിച്ചു. എ.ഡി.എം എന്.ഐ ഷാജുവിന്റെ അധ്യക്ഷതയില് ഇത് സംബന്ധിച്ച് കളക്ടറേറ്റില് ചേര്ന്ന യോഗതീരുമാനത്തിന്റെ അടിസ്ഥാനത്തിലാണ് ക്രമീകരണം
സുല്ത്താന് ബത്തേരി ഭാഗത്ത് നിന്നും കല്പ്പറ്റ – വൈത്തിരി വഴി കോഴിക്കോട് ഭാഗത്തേക്ക് പോകുന്ന ചരക്ക് ലോറികളും ഹെവി വാഹനങ്ങളും നാളെ (വ്യാഴം) രാത്രി 8 മണി മുതല് ബീനാച്ചി- പനമരം , മീനങ്ങാടി – പച്ചിലക്കാട്, പക്രതളം ചുരം വഴിയോ പോകേണ്ടതാണ്.
മാനന്തവാടിയില് നിന്നുള്ള വാഹനങ്ങളും ഇപ്രകാരം പോകേണ്ടതാണ്.
സുല്ത്താന് ബത്തേരി, മാനന്തവാടി ഭാഗത്ത് നിന്നും കോഴിക്കോട് ഭാഗത്തേക്ക് പോകുന്ന KSRTC, സ്വകാര്യ ബസ്സുകള് രാത്രി 9 മണിക്ക് ശേഷം കല്പ്പറ്റയില് നിന്നും പടിഞ്ഞാറത്തറ വഴി പക്രതളം ചുരത്തിലൂടെ പോകേണ്ടതാണ്.
ബത്തേരി, കല്പ്പറ്റ ഭാഗങ്ങളില് നിന്നും തൃശ്ശൂര്, മലപ്പുറം ഭാഗങ്ങളിലേക്ക് പോകുന്ന വാഹനങ്ങള് തമിഴ്നാട് നാടുകാണി ചുരം വഴി പോകേണ്ടതാണ്.
രാത്രി 9 മണിക്ക് ശേഷം കല്പ്പറ്റ, മേപ്പാടി, പടിഞ്ഞാറത്തറ ഭാഗങ്ങളില് നിന്നും വൈത്തിരി വഴി കോഴിക്കോട് ഭാഗത്തേക്ക് ആംബുലന്സ് ഒഴികെ മറ്റൊരു വാഹനവും പോകാന് അനുവദിക്കില്ല.
