തിരുവമ്പാടി : മൂന്നാമത് ജനചേതന നാടകസർഗോത്സവത്തിന് ഇന്ന് (ജനുവരി 10) തിരശ്ശീല ഉയരും. തിരുവമ്പാടി അനുരാഗ് ഓഡിറ്റോറിയത്തിലെ തുറന്നവേദിയിലാണ് മൂന്നുദിവസം നീണ്ടുനിൽക്കുന്ന നാടകോത്സവം. സൗജന്യമാണ് പ്രവേശനം. പുസ്തകമേളയും ഒരുക്കിയിട്ടുണ്ട്. വൈകുന്നേരം അഞ്ചിന് കേരള സാഹിത്യഅക്കാദമി വൈസ് പ്രസിഡന്റ് അശോകൻ ചരുവിൽ ഉദ്ഘാടനം ചെയ്യും.
ചലച്ചിത്രനാടക അഭിനേത്രി ബീന ആർ. ചന്ദ്രൻ മുഖ്യാതിഥിയാകും. ജോസ് വർഗീസ് രചിച്ച ‘ഒരു കടിയേറ്റക്കാരന്റെ ഓർമ്മക്കുറിപ്പുകൾ’ എന്ന പുസ്തകം പ്രഫ. ഹമീദ് ചേന്നമംഗലൂർ പ്രകാശനംചെയ്യും. തുടർന്ന് ബീന ആർ. ചന്ദ്രന്റെ ‘ഒറ്റഞാവൽ മരം’ എന്ന ഏകപാത്ര നാടകവും കെ.പി.എ.സി.യുടെ ‘ഉമ്മാച്ചു’ നാടകവും അരങ്ങേറും. രാവിലെ 10-ന് ചിത്രകലാ ക്യാമ്പോടെയാണ് നാടകോത്സവം ആരംഭിക്കുന്നത്. വൈകീട്ട് മൂന്നിന് ചിത്രകലാപ്രദർശനം ആരംഭിക്കും. ശനിയാഴ്ച രാവിലെ 10-ന് ഫോക്ലോർ സെമിനാർ കലാമണ്ഡലം വൈസ് ചാൻസലർ പ്രൊഫ. ബി. അനന്തകൃഷ്ണൻ ഉദ്ഘാടനം ചെയ്യും. കവിയും ഗാനരചയിതാവുമായ വയലാർ ശരത്ചന്ദ്ര വർമ മുഖ്യാതിഥിയാകും.
ഉച്ചയ്ക്ക് 2.30-ന് കെ.ജെ. ബേബി അനുസ്മരണം ഡോ. ജോസഫ് കെ. ജോബ് നിർവഹിക്കും. തുടർന്ന് എം.എൽ. ഷീജ രചിച്ച ‘കാശി ടു കൗസാനി’ പുസ്തകം വനിതാ കമ്മിഷൻ ചെയർപേഴ്സൺ അഡ്വ. പി. സതീദേവി നിർവഹിക്കും. 4.30-ന് മ്യൂസിക് ബാൻഡ് കവര, തുടർന്ന് ജടായു, പണയം എന്നീ നാടകങ്ങൾ അരങ്ങേറും, എട്ടിന് കീഴില്ലം ഉണ്ണികൃഷ്ണനും സംഘവും അവതരിപ്പിക്കുന്ന മുടിയേറ്റ് കലാവിഷ്കാരം.
ഞായറാഴ്ച രാവിലെ 10-ന് കവിതാ ശില്പശാല പി.എൻ. ഗോപീകൃഷ്ണൻ ഉദ്ഘാടനം ചെയ്യും. ഉച്ചയ്ക്ക് രണ്ടിന് കവിയരങ്ങിന്റെ ഉദ്ഘാടനം ഡോ. ആസാദ് നിർവഹിക്കും. നാലിന് വെള്ളിനേഴി കഥകളി സംഘം അവതരിപ്പിക്കുന്ന കല്യാണസൗഗന്ധികം കഥകളി അരങ്ങേറും. ആറിന് നടക്കുന്ന സമാപനസമ്മേളനത്തിൽ സുനിൽ പി. ഇളയിടം പ്രഭാഷണം നടത്തും. തുടർന്ന് അവാർഡ്, തുന്നൽക്കാരി, 100 ശതമാനം സിന്ദാബാദ് എന്നീ നാടകങ്ങൾ അരങ്ങേറും. പത്രസമ്മേളനത്തിൽ ജനചേതന ഡയറക്ടർ ഡോ. ജെയിംസ് പോൾ, ഫെസ്റ്റിവൽ ഡയറക്ടർ ഡോ. ടി.കെ. അബ്ബാസ് അലി, കെ. ആർ. ബാബു, ജോസ് മാത്യു, ജോളി ജോസഫ്, പി.ടി. അഗസ്റ്റ്യൻ എന്നിവർ പങ്കെടുത്തു.
