വാഹന ഉടമകളെ ലക്ഷ്യമിട്ട് വ്യാജ ഇ-ചെല്ലാൻ സന്ദേശങ്ങൾ അയച്ച് പണം തട്ടുന്ന പുതിയ രീതിക്കെതിരെ ജാഗ്രത പാലിക്കണമെന്ന് കേരള പോലീസ് മുന്നറിയിപ്പ് നൽകി. ഔദ്യോഗിക ഗതാഗത വകുപ്പിന്റെയോ പോലീസിന്റെയോ സന്ദേശമാണെന്ന് തെറ്റിദ്ധരിപ്പിക്കുന്ന രീതിയിലാണ് തട്ടിപ്പുകാർ ആളുകളുടെ മൊബൈലുകളിലേക്ക് സന്ദേശങ്ങൾ അയക്കുന്നത്.
പൊതുജനങ്ങൾ ശ്രദ്ധിക്കേണ്ട കാര്യങ്ങൾ:
ഇ-ചെല്ലാൻ, ട്രാഫിക് ഫൈൻ, വാഹന വെരിഫിക്കേഷൻ എന്നിവയുടെ പേരിൽ എസ്.എം.എസ്, വാട്ട്സ്ആപ്പ് തുടങ്ങിയവ വഴി ലഭിക്കുന്ന അജ്ഞാത എ.പി.കെ (APK) ഫയലുകൾ യാതൊരു കാരണവശാലും ഇൻസ്റ്റാൾ ചെയ്യരുത്.
ചെല്ലാൻ സംബന്ധിച്ച വിവരങ്ങൾ ഔദ്യോഗിക എം.വി.ഡി (MVD) വെബ്സൈറ്റ് വഴിയോ ബന്ധപ്പെട്ട തദ്ദേശീയ സർക്കാർ ആപ്പുകൾ വഴിയോ മാത്രം പരിശോധിക്കുക.
അബദ്ധത്തിൽ ഇത്തരം എ.പി.കെ ഫയലുകൾ ഇൻസ്റ്റാൾ ചെയ്തതായി സംശയമുണ്ടെങ്കിൽ ഉടൻ തന്നെ ഫോണിന്റെ ഇന്റർനെറ്റ് കണക്ഷൻ വിച്ഛേദിക്കുക. തുടർന്ന് ആപ്പ് അൺഇൻസ്റ്റാൾ ചെയ്യുകയും ഫോൺ റീസെറ്റ് (Reset) ചെയ്യുകയും വേണം.
യു.പി.ഐ (UPI) / മറ്റ് പേയ്മെന്റ് ആപ്പുകൾ, ലിങ്ക് ചെയ്തിട്ടുള്ള ബാങ്ക് അക്കൗണ്ടുകൾ, അടുത്തിടെ നടന്ന സാമ്പത്തിക ഇടപാടുകൾ എന്നിവ പരിശോധിച്ച് സുരക്ഷിതമാണെന്ന് ഉറപ്പുവരുത്തുക.
ഇത്തരം തട്ടിപ്പുകൾ ശ്രദ്ധയിൽപ്പെടുകയോ പണം നഷ്ടപ്പെടുകയോ ചെയ്താൽ ആദ്യത്തെ ഒരു മണിക്കൂറിനുള്ളിൽ (“ഗോൾഡൻ അവർ”) തന്നെ 1930 എന്ന നമ്പറിലോ https://cybercrime.gov.in എന്ന ഔദ്യോഗിക വെബ്സൈറ്റ് മുഖേനയോ സൈബർ പോലീസിനെ വിവരമറിയിക്കുക.
തട്ടിപ്പ് രീതി ഇങ്ങനെ:
വിവിധ സ്വകാര്യ മൊബൈൽ നമ്പറുകളിൽ നിന്നാണ് വാഹനം ഉപയോഗിക്കുന്നവരുടെ ഫോണുകളിലേക്ക് ഇ-ചെല്ലാൻ വിവരങ്ങൾ എന്ന വ്യാജേന സന്ദേശങ്ങൾ എത്തുന്നത്. വെരിഫിക്കേഷൻ പൂർത്തിയാക്കാനായി സന്ദേശത്തിനൊപ്പമുള്ള ലിങ്കിൽ ക്ലിക്ക് ചെയ്ത് ആപ്ലിക്കേഷൻ ഡൗൺലോഡ് ചെയ്യാൻ ആവശ്യപ്പെടും. തുടർന്ന് ലഭിക്കുന്ന ‘യെസ്’ ഓപ്ഷനിൽ അമർത്തുന്നതോടെ അപകടകരമായ ഒരു എ.പി.കെ (APK) ഫയൽ ഫോണിലേക്ക് ഇൻസ്റ്റാൾ ആകുന്നു.
ഈ ഫയൽ ഇൻസ്റ്റാൾ ആകുന്നതോടെ ഫോണിന്റെ പൂർണ്ണ നിയന്ത്രണം തട്ടിയെടുക്കാനുള്ള അനുമതികൾ (Permissions) ഉപയോക്താവിൽ നിന്ന് ചോദിച്ചറിയും. അനുമതി നൽകുന്നതോടെ ഫോൺ ഹാക്ക് ചെയ്യപ്പെടുകയും, അതിലുള്ള ബാങ്കിങ് വിവരങ്ങൾ അടക്കമുള്ള സുപ്രധാന ഡാറ്റ തട്ടിപ്പുകാരുടെ കൈകളിൽ എത്തുകയും ചെയ്യും.
