കോഴിക്കോട്; വനംവകുപ്പില് പൊതുജനങ്ങളുമായി നേരിട്ട് ബന്ധപ്പെടുന്ന ഫയലുകളില് അടിയന്തിര നടപടി സ്വീകരിക്കുന്നതിന് അദാലത്തുകള് നടത്തും. സംസ്ഥാനത്തെ വിവിധ സര്ക്കിളുകളില് നടത്തുന്ന അദാലത്തുകളില് വനം വകുപ്പ് മന്ത്രി എ.കെ ശശീന്ദ്രനും ഉന്നത വനംവകുപ്പ് ഉദ്യോഗസ്ഥരും പങ്കെടുക്കും. സര്ക്കാരിന്റെ ഫയല് തീര്പ്പാക്കല് തീവ്രയജ്ഞ പരിപാടികളുടെ ഭാഗമായി പരമാവധി ഫയലുകള് തീര്പ്പാക്കുന്നതിനാണ് നടപടി.
ആദ്യ അദാലത്ത് ആഗസ്റ്റ് 11ന് രാവിലെ 11 മണിക്ക് കോഴിക്കോട് മാത്തോട്ടം വനശ്രീ ഫോറസ്റ്റ് കോംപ്ലക്സില് നടക്കും. കണ്ണൂര് ഫോറസ്റ്റ് സര്ക്കിള് പരിധിയിലെ ഡിവിഷനുകളില് ഉള്ള പരമാവധി അപേക്ഷകള് തീര്പ്പാക്കി കൊണ്ടുള്ള പ്രഖ്യാപനം അദാലത്തിനുശേഷം മന്ത്രി എ കെ ശശീന്ദ്രന് നടത്തും. റെയിഞ്ച്, ഡിവിഷന്, സര്ക്കിള്, ഹെഡ്കോര്ട്ടേഴ്സ് തലങ്ങളിലുള്ള ഫയലുകള് പരിശോധിച്ച് തീര്പ്പു കല്പ്പിക്കുന്നതിനുള്ള അടിയന്തര നടപടികള് പുരോഗമിക്കുകയാണ്. ജൂണ് മുതല് സെപ്റ്റംബര് വരെയുള്ള കാലയളവില് അഞ്ചു റൗണ്ട് അവലോകനവും പരിശോധനയും വിവിധതലങ്ങളില് പൂര്ത്തിയാകും.
മറ്റിടങ്ങളിലെ അദാലത്തുകള്: ആഗസ്റ്റ് 25ന് എറണാകുളത്ത് (തൃശ്ശൂര് സര്ക്കിള്), 26ന് പാലക്കാട്, 30ന് കൊല്ലം, 31 ന് തിരുവനന്തപുരത്ത് വനംവകുപ്പ് ആസ്ഥാനം, സെപ്റ്റംബര് ഒന്നിന് കോട്ടയം എന്നിവിടങ്ങളിലാണ് അദാലത്ത് നടക്കുക
