നിപ: 17 പേരുടെ ഫലം നെഗറ്റീവ്;സമ്പര്ക്ക പട്ടികയില് 460 പേർഐസൊലേഷനിലുള്ളവര് ക്വാറന്റയിന് പൂര്ത്തിയാക്കണം
മലപ്പുറം:നിപ രോഗബാധയുമായി ബന്ധപ്പെട്ട് ഇന്ന് (ജൂലൈ 23) പുറത്തു വന്ന 17 സ്രവ പരിശോധനാ ഫലങ്ങളും നെഗറ്റീവ് ആണെന്ന് സംസ്ഥാന ആരോഗ്യ കുടുംബക്ഷേമ വകുപ്പ് മന്ത്രി വീണാ ജോര്ജ് അറിയിച്ചു. മലപ്പുറം കളക്ടറേറ്റ് കോണ്ഫ്രന്സ് ഹാളില് വൈകീട്ട് ചേര്ന്ന നിപ അവലോകന യോഗത്തിനു ശേഷം സംസാരിക്കുകയായിരുന്നു മന്ത്രി. ഐസൊലേഷനില് കഴിയുന്നവര് 21 ദിവസത്തെ ക്വാറന്റയിനില് തുടരണമെന്നും പ്രോട്ടോകോള് ലംഘിക്കുന്നവര്ക്കെതിരെ പൊതുജനാരോഗ്യ നിയമപ്രകാരമുള്ള നിയമനടപടികള് സ്വീകരിക്കുമെന്നും മന്ത്രി അറിയിച്ചു.
നിലവില് 460 പേരാണ് സമ്പര്ക്ക പട്ടികയില് ഉള്ളത്. ഇതില് 220 പേര് ഹൈറിസ്ക് വിഭാഗത്തില് ഉള്പ്പെട്ടവരാണ്. ഹൈ റിസ്ക് വിഭാഗത്തില് ഉള്പ്പെട്ടവരില് 142 പേര് ആരോഗ്യ പ്രവര്ത്തകരാണ്. സമ്പര്ക്ക പട്ടികയില് ഉള്പ്പെട്ട 19 പേരാണ് വിവിധ ആശുപത്രികളില് അഡ്മിറ്റായി ചികിത്സ തുടരുന്നത്. മഞ്ചേരി മെഡിക്കല് കോളേജില് 17 പേരും തിരുവനന്തപുരത്ത് രണ്ടു പേരും.
രോഗ പ്രതിരോധ പ്രവര്ത്തനങ്ങളുടെ ഭാഗമായി ഫീല്ഡ് തലത്തില് ശക്തമായ പ്രതിരോധ പ്രവര്ത്തനങ്ങളാണ് നടന്നു വരുന്നത്. പാണ്ടിക്കാട്, ആനക്കയം ഗ്രാമപഞ്ചായത്തുകളിലായി ആരോഗ്യ വകുപ്പിന്റെ നേതൃത്വത്തില് ഇതുവരെ 18055 വീടുകള് സന്ദര്ശിച്ചു. പാണ്ടിക്കാട് 10248 വീടുകളും ആനക്കയത്ത് 7807 വീടുകളും സന്ദര്ശിച്ചു. പാണ്ടിക്കാട് 728 പനി കേസുകളും ആനക്കയത്ത് 286 പനിക്കേസുകളുമാണ് റിപ്പോര്ട്ട് ചെയ്തത്. രോഗ ബാധയുമായി ബന്ധപ്പെട്ട് യാതൊരു ആശങ്കയുടെയും ആവശ്യമില്ല. സി.സി.ടി.വി ദൃശ്യങ്ങള് സഹിതം പരിശോധിച്ച് ഒരാളെ പോലും വിട്ടു പോവാത്ത വിധം കുറ്റമറ്റ രീതിയിലാണ് സമ്പര്ക്ക തയ്യാറാക്കുന്നത്.
കളക്ടറേറ്റ് കോണ്ഫറന്സ് ഹാളില് ചേര്ന്ന യോഗത്തില് ആരോഗ്യ വകുപ്പ് അഡീഷണല് ചീഫ് സെക്രട്ടറി രാജന് നമദേവ് കോബര്ഗഡെ ഓണ്ലൈനായും ജില്ലാ കളക്ടര് വി.ആര്. വിനോദ്, ജില്ലാ പൊലീസ് മേധാവി എസ്. ശശിധരന്, ആരോഗ്യ വകുപ്പ് ഡയറക്ടര് ഡോ.കെ.ജെ റീന, ജില്ലാ മെഡിക്കല് ഓഫീസര് ഡോ.ആര്. രേണുക, തുടങ്ങിയവര് ഓഫ് ലൈനായും പങ്കെടുത്തു.
