യാത്രകൾ ഏവർക്കും പ്രിയപ്പെട്ടതാണ്. എന്നാൽ കാറിലോ ബസിലോ ട്രെയിനിലോ വിമാനത്തിലോ ബോട്ടിലോ യാത്ര ചെയ്യുമ്പോൾ ചിലർക്ക് തലകറക്കം, ഓക്കാനം, ഛർദി തുടങ്ങിയ ലക്ഷണങ്ങൾ അനുഭവപ്പെടാറുണ്ട്.
അത് കാരണം യാത്രകൾ മാറ്റിവെക്കുന്നവരും ഏറെയാണ്. കണ്ണുകൾ കാണുന്ന ചലനവും അകത്തെ ചെവി തിരിച്ചറിയുന്ന ചലനവും തമ്മിൽ പൊരുത്തക്കേടുണ്ടാകുമ്പോഴാണ് സാധാരണയായി മോഷൻ സിക്ക്നസ് ഉണ്ടാകുന്നത്.
മോഷൻ സിക്ക്നസിന് കാരണമാകുന്ന സാഹചര്യങ്ങൾ ഒഴിവാക്കുന്നതാണ് ഏറ്റവും നല്ല പ്രതിരോധ മാർഗം. എന്നാൽ യാത്രയ്ക്കിടെ ഇത് എല്ലായ്പ്പോഴും സാധ്യമാകണമെന്നില്ല. ലക്ഷണങ്ങൾ കുറയ്ക്കാൻ താഴെ പറയുന്ന കാര്യങ്ങൾ സഹായിച്ചേക്കാം.
1. കാറിലോ ബസിലോ മുൻവശത്തെ സീറ്റിൽ ഇരിക്കുക.
2.വിമാനത്തിലും ട്രെയിനിലും സാധ്യമെങ്കിൽ വിൻഡോ സീറ്റ് തിരഞ്ഞെടുക്കുക.
3.സാധ്യമെങ്കിൽ കിടക്കുകയോ കണ്ണുകൾ അടയ്ക്കുകയോ ഉറങ്ങാൻ ശ്രമിക്കുകയോ ചെയ്യാം.
4.ആവശ്യത്തിന് വെള്ളം കുടിച്ച് ശരീരത്തിൽ ജലാംശം നിലനിർത്തുക.
5.മദ്യവും കഫീൻ അടങ്ങിയ പാനീയങ്ങളും പരിമിതപ്പെടുത്തുക.
6.ഒരേസമയം വലിയ അളവിൽ ഭക്ഷണം കഴിക്കുന്നതിന് പകരം ചെറിയ അളവിൽ ഇടയ്ക്കിടെ കഴിക്കുക.
7.പുകവലി ഒഴിവാക്കുക. കുറച്ച് സമയത്തേക്ക് പുകവലി നിർത്തുന്നതും സഹായിച്ചേക്കാം.
8.സംഗീതം കേൾക്കുന്നതുപോലുള്ള ശ്രദ്ധതിരിക്കുന്ന പ്രവർത്തനങ്ങളിൽ ഏർപ്പെടാം.
9.ഇഞ്ചി മിഠായി പോലുള്ളവ ഉപയോഗിച്ച് നോക്കാം.
മോഷൻ സിക്ക്നസിന് മരുന്നുകൾ
മോഷൻ സിക്ക്നസ് തടയാനും ചികിത്സിക്കാനും ചില മരുന്നുകൾ ഉപയോഗിക്കാറുണ്ട്. എന്നാൽ ഇവയിൽ പലതും മയക്കമോ ഉറക്കമോ ഉണ്ടാക്കാൻ സാധ്യതയുണ്ട്. അതിനാൽ മരുന്നുകൾ ഉപയോഗിക്കുന്നതിന് മുമ്പ് ആരോഗ്യപ്രവർത്തകന്റെ നിർദേശം തേടണം.
കുട്ടികളിൽ മോഷൻ സിക്ക്നസ് കൂടുതലോ?
2 മുതൽ 12 വയസുവരെയുള്ള കുട്ടികളിലാണ് മോഷൻ സിക്ക്നസ് കൂടുതലായി കാണപ്പെടുന്നത്. എന്നാൽ കുട്ടികളിൽ മോഷൻ സിക്ക്നസ് തടയുന്നതിനോ ചികിത്സിക്കുന്നതിനോ ഉപയോഗിക്കുന്ന എല്ലാ മരുന്നുകളും സുരക്ഷിതമായിരിക്കണമെന്നില്ല.
കുട്ടികൾക്ക് മരുന്ന് നൽകുന്നതിന് മുമ്പ് ആരോഗ്യപ്രവർത്തകന്റെ നിർദേശം തേടണം. പ്രായത്തിനും ശരീരഭാരത്തിനും അനുസരിച്ചുള്ള ശരിയായ ഡോസ് മാത്രം നൽകുകയും വേണം.
മോഷൻ സിക്ക്നസിനുള്ള ചില മരുന്നുകൾ മുതിർന്നവരിലും കുട്ടികളിലും മയക്കം ഉണ്ടാക്കാം. എന്നാൽ ചില കുട്ടികളിൽ ഇതിന് വിപരീതമായ പ്രതികരണമുണ്ടാകാനും സാധ്യതയുണ്ട്. ഡോക്ടറുടെ നിർദേശമില്ലാതെ കുട്ടികൾക്ക് മോഷൻ സിക്ക്നസിനുള്ള മരുന്നുകൾ നൽകരുത്.
